دوام الحال من المحال

احيانا بحس ان الحياة واخده شكل واحد ومش هتتغير لكن دايما بسمع في ودني كلمه دوام الحال من المحال

اوقات بكون فرحان لدرجه متتصورش تقوم الكلمه طالعه في ودني جري

وفي الحزن نفس الموقف تماما

هي دي الحياة يوم ليك وعشرة عليك لحد ما تتعود وتوصل لدرجه انك لما تفرح تبقى متأكد انك هتزعل تاني

على راي المثل دنيا فانيه وزمن كباااااااس

بس رغم كل حاجه وحشه بتحصل في الدنيا بتلاقي شمعه ممكن -بأكد على ممكن- تنور حياتك ولو لفترة لو مشينا بالمبدأ الغبي من وجهه نظري

الحياة كما تراها عيني كلمه كتبتها في تعريفي -بعد اعتزازي بعروبتي - طبعا جمله من خمس كلمات بس كبييييرة قوي اكتر من اي حد ما يتخيل او يفكر

ازاي انت شايف الحياة ومن اي جهه

بصراحه اوقات كتير - اعتراف - بشوف الدنيا سووووووده قوي لدرجه اني بفكر في حاجات ميفكرش فيها حد عاقل وبعغمل تصرفات ميعملهاش حد عايز يعيش فيها جزء بيكون بغير ارادتي - ازاي دي قصه تانيه - وفيها الجزء الاكبر بيكون بأرادتي

بغلط زي ما اي انسان طبيعي بيغلط وساعات بستمر في الغلط-اعتراف تاني- بس بسرعه برجع عن الخطأ
قولت كتير عشان اوصل في الاخر ان في شمعه في الظلمه السودا قوي بتطلع بتنور الحياة

ياريت تكوني الشمعه

كتب قومي عربي ~
الثلاثاء، مايو ١٥، ٢٠٠٧
1 التعليقات

بيان من حزب الكرامة

حزب الكرامة يقاطع انتخابات الشورى ترشيحا وتصويتا
تعبيرا عن مواقفه المبدئيه في مواجهه وتعرية الزيف الحكومي, ناقش حزب الكرامة في الاجتماع الشهري للجنته التنسيقيه , موضوع انتخابات مجلس الشورى وبعد عرض المنسق العام المهندس محمد سامي ملف القضيه من كافه جوانبه , واستعراض راي نائبي الحزب بمجلس الشعب , حمدين صباحي وسعد عبود , قررت لجنه التنسيق وبأغلبيه الاراء رفض المشاركة بالترشيح او الانتخاب لمجلس الشورى وذلك بعد اقرار "التعديات" الدستورية التى تكرس الانفراد بالسلطه وحجب المشاركه عن القوى السياسيه والشعبيه , خاصه في ظل المواد 76, 88, 179, بالاضافه لاقرار قانون الحقوق السياسيه , الذي يسمح بشطب المرشح دون عرضه على هيئه مفوضي الدوله , ويكرس مرة اخرى لضعف الدور التشريعي لمجلس الشورى , اضافه الى استبعاد القضاه من الاشراف على العمليه الانتخابيه ولهذه الاسباب , قررت لجنه تنسيق الحزب رفض المشاركة ترشيحا وانتخابا وممارسه المزيد من النضال لكشف وفضح ممارسات الاستبداد الحكومي والعمل مع كافه القوى السياسيه الرافضه لهيمنه النظام السياسي على ساحات التشريع والرقابه , من اجل انتزاع الحقوق السياسيه المشروعه.

كتب قومي عربي ~
الجمعة، مايو ١١، ٢٠٠٧
1 التعليقات

خليك في البيت

دعوه اطلقها افراد واول من نشرها حمدين صباحي في مقاله الاسبوعي بجريدة الكرامة

هي دعوه للاعتصام والبقاء في المنزل كتجربة يوم 23 يوليو القادم كذكرى لثورة يوليو و كأختبار لاعتصام مدني حقيقي

واطلق عليها اسم خليك في البيت

من لدية اي اقتراحات فليرسلها على

KHALEK_FEALBEET@hotmail.com

خليكوا في البيت يوم 23 يوليو

كتب قومي عربي ~
السبت، مايو ٠٥، ٢٠٠٧
0 التعليقات

الحرية لمنعم الحرية للمعتقليين

الحرية لمحمد عبد المنعم

الحرية لخيرت الشاطر

الحرية لحسن مالك

الحرية لكل معتقلي الاخوان المحالون للمحاكمه العسكرية والغير محاليين
الحرية لكل المدونيين الحرية لكريم نبيل

عاش نضال الشعب العربي

بأي ذنب اعتقلوا هل ذنبهم حب الوطن هل ذنبهم ايمانهم بالحرية

عاشت الحرية وعاشت مصر التي من اجلها نعتقل ونهان

اذا كان حب مصر جريمة فليشهد الجميع بانني مجرم

كتب قومي عربي ~
الجمعة، أبريل ٢٧، ٢٠٠٧
0 التعليقات

مخنوووق !!!!

مش عارف ابدأ منين وبأيه ؟؟؟

حاجات كتير قوي حاسس انها غلطت مش عارف مين الغلط بالزبط انا ولا الحياة اللي كل ما احس انها بتضحكلي القيها بتقفل تاني في وشي

في الشغل كل ما احس اني خلاص هتمشي كويس فجأة بح

في الحب كل ما احس اني قربت من حبيبتي تبعد اكتر من الاول

في الصداقه كل ما احس اني عرفت اختار اصحابي ابعد

في العيله كل ما احس اني اخذت وضعي يحصل اللي يرجعني تاني

يااااااااااااااااااه في كل حاجه في حياتي حاسس ان في غلطه

غلطه مش عارف اعديها غلطه مش قادر اعرف هيا فيا ولا فيهم

ممكن تكون فيا بس اكيد مش انا اللي غلط على طول

طبيعي اني اغلط زي اي انسان

بس كل انسان بيغلط اكيد بيعمل حاجه صح

مش عارف كل اللي حاسه اني مخنوق لابعد الحدود

كل اللي عارفه اني فعلا مش عايز اعيش وفي نفس الوقت مش عايز اموت هههههه

تمني الموت حرام عارف بس الحياة كده برضه اكيد حرام

اكيد اكيد حرام

كتب قومي عربي ~
الجمعة، أبريل ١٣، ٢٠٠٧
1 التعليقات

انت فين يا عم اسماعيل

انا اصلي من الارياف ومن محافظه دمياط بالتحديد

بيتي وسط اراضي زراعية وخضرة كتير وشجر ونخل وكلام من الحلو اللي بيريح الاعصاب ده

متعود دايما اني اقضي يوم شم النسيم مع عائلتي واسرتي كلها ومتعود كمان اني اقوم من النوم بدري -عكس المعتاد طبعا- خصوصا اليوم ده عشان افتح شباك غرفتي واتفرج على الاطفال والناس وهيا بتجري في الارض اللي وراى بيتنا وعم اسماعيل قاعد على الترعه كده زعق شويه في العيال (ابعد يا واد انت وهو لتقع في المصرف ) وبعدين يقوم يعقد مع ام احمد -مراته طبعا - ويمدد جسمه على الارض وانا كنت متعود اصبح عليه ازيك يا عم اسماعيل

ويرد عليا ازيك يا دكتور - طبعا مفكرني فادي اخويا الكبير زي بيقت الشارع كلهم بيقولولي يا دكتور على اساس ان فادي مش بيظهر كتير .

وارد عليه اقوله يا عم اسماعيل انا فجر بتاع كليه الحقوق يقولي ما العز واحد ازيك يا استاذ فجر

وافضل اتفرج طول اليوم على الاطفال وهيا بتجري وتلعب بالكورة في اليوم ده بالتحديد في السنه بحس ان لسه الدنيا بخير وفي ناس طيبه وناس كويسه واننا اكيد هتغير عندي كلمه انا شايف انها بتاعتي انه طول ما احنا بنشوف فلاحين في الاراضي ماسكين الفأس طول ما احنا بخير

صحيت يوم الاتنين الساعه 10 الصبح واول حاجه عملتها قمت جري فاتح شباك الغرفه بتاعتي عشان اصبح على عم اسماعيل وكانت الصدمه فعلا ليا ملقتش عم اسماعيل ولا لقيت ام احمد وبصيت على الاراضي الكتير اللي حوالين بيتنا ملقتش ناس قاعده فيها حست بخنقه شديده روحت لامي جري لقيتها بتقولي كل سنه وانتي طيب رديت عليها وسالتها هو يا ماما مش النهارده شم النسيم ؟؟؟

قالتلي اه

قولتلها امال فين عم اسماعيل

قالتلي هو حد فاضي يا فجر اعملك تفطر ايه

سيبتها ورجعت على الشباك ممكن يكون عم اسماعيل جه

ملقتوش برضه فطرت وقولت اعدي قدام بيته ممكن يكون تعبان اطمن عليه بالمرة

ليقته فارش حصيرة وقاعد قدام البيت روحت اسلم عيله

ازيك يا عم اسماعيل

ازيك يا دكتور - معلقتش المره دي - قولتله هو انته مرحتش ليه النهارده انت وام احمد والعيال عشان شم النسيم

قالي هو حد فاضي يا بني للكلام ده اليومين دول

بصيتله كده نظرة استعجاب واستأذنت منه ومشيت وانا حاسس ان على صدري طوبه كبيرة قوي

وروحت كملت نوم

كتب قومي عربي ~
الأربعاء، أبريل ١١، ٢٠٠٧
2 التعليقات

رابطه اطفال من اجل الحرية

كنت في منتهى السعاده وانا اشرف على انتخابات هذه الرابطه - حتى لو كان شكليا - فقد كان شعوري غريب

كنت اشعر ان هؤلاء الاطفال يمنحوني القوة على استمرار ما انا عليه من معارضه لنظام فقد شرعيته لماذا ؟؟؟

انا لااعلم

فقد شعرت انهم ونعم المستقبل لهذه الامه التي تستحق وبكل تقدير ان يكون مستقبلها افضل من ماضيها

وحتى لو وصل الاخوان للحكم فأنا سأكون اول المرحبيين بذلك رغم اختلافي معهم في مجموعه من الامور

اطفال من اجل الحرية من الممكن ان تكون باكورة التغيير المنتظرة ولما لا

فعيونهم تمنحني - شخصيا - العزيمه على الاستمرار

شرفني ان اكون منهم ولو للحظات قليله لحظات قليله جعلتني اعاهد نفسي ان احارب في صفهم -رغم اختلافي - فأنا معهم حتى يعود اباءهم من المعتقلات

مهعم حتى ننهي عصر المحاكمات العسكرية للمدنيين

معهم حتى ننهي عصر مبارك

واخيرا

عاش نضال الشعب العربي على مبدئ الحرية والاشتراكية والوحده

كتب قومي عربي ~
الخميس، أبريل ٠٥، ٢٠٠٧
0 التعليقات