اه والف اه عليكي يا بلد

اه والف اه عليكي يا بلد

كتب قومي عربي
الأحد، مارس ١١، ٢٠٠٧

اعترف اني مش بعرف اكتب زي ما الكتاب الشباب او الكبار بيكتبوا وممكن مش بعرف اعبر كويس عن كلامي بس هحاول استرسل وانا بكلم

هتكلم في شويه نقط الاولى خاصه طبعا بالتعديلات الدستورية بس انا ليا لقطه فيها بعيدا عن الغاء كلمه الاشتراكيه والاشراف القضائي وقانون الارهاب وكل ده هتكلم عن جمال مبارك وهو بيتكلم في لجنه السياسات مش عارف بحاول اشوفه وهوبيتكلم عشان اعرف ملامح وشه رايحه فين وجايه منين
من حوالي كام يوم كان في اجتماع للجنه الهباب اللي هما مشكلينها عشان تناقش التعديلات الدستورية من وجهه نظر الحزب الواطي -لامواخذه -الوطني قعدت اتفرج على سي جمال وهو بيتكلم في عنطزة غريبه وثقه كبيرة لدرجه الغرور وبيتكلم كأنه خلاص بقى ريس رغم ان المنطق بيقول انه لازم يبقى ريس ابن الريس هيشتغل ايه مثلا صحفي لا ازاي ريس زي ابوة محنا عندنا في مصر الواد ابن الاكابر لازم يطلع زي ابوة -ده لو كان ابن اكابر فعلا-فطبيعي انه يتكلم كده ويشوف انه لازم يحصل تشاور وان الشعب المصري -اللي هو منه طبعا -لسه جديد على الديمقراطيه عشان كده لازم نتكلم معاهم بالراحه وكلام زي كده

حركات ايده نظرته ابتسامته كل دول تحس انهم فعلا مرسومين مصطنعيين مش عارف التعبير الصح بس هو حاجه زي كده

اللي تعبني اكتر لما القي واحد زي كرم جبر بتاع جريده لجنه السياسات-روزاليوسف سابقا- كاتب شعر وان قدايه سي جمال حنين وبيطبطب ويدلع- على راي الست نانسي- فيهم وانه عامل زي الاب الحنون رغم انه كرم هبر اكبر من جيمي

كفايه كده النهارده هجيب بقيت النقط بعدين اصلي بقيت متنرفز جدا من الكلام اللي كتبته ده وتقولي ليه كتبته رغم انه هينرفزك هقولك معرفش

مسك الختام عبد الناصر عود الفل بعدك يابا شوفنا الذل