عن رمضان والصيام واكيد الحب
الأحد، سبتمبر ٠٩، ٢٠٠٧
اولا وقبل اي كلام كل سنه واي حد بيقرى الكلام ده طيب
رمضان كريم عليا وعليكم وربنا يعيد الايام دي علينا كلنا بخير ان شاء الله
مش عارف برضه زي كل مرة هبدأ منين وبأيه رمضان طبعا شهر كل الناس بتحبه وانا كواحد من الناس بحبه رغم ان فيه ذكرى موت والدي الله يرحمه يوم 3 رمضان ورغم ان انا حاسس ان رمضان جه بسرعه بس برضه كل سنه وانتم طيبيين .
رمضان فعلا دايما بيكون ليه طعم تاني خالص في الحياه وغير الشهور الكتير اللي بتمر زي بعضها دي فكرة ان كل الناس بتاكل في وقت تاني والشباب اللي بيروح يصلي والشباب اللي بينزل جري بعد الفطار عشان يعقد على القهوى ويشرب قهوه زياده في كبايه وسجاير كتير ويفرقع صواريخ في صبي القهوه ونهزر ونتكلم على الاغاني والفطار والصلاه والصوم واللي بينام طول النهار ويقوم على الفطار صيامه 000صح ولا لا ياااااااااااااااااااااااااااااااااه رمضان واغاني حلو يا حلو ورمضان جانا وكلام كتير ولعب الكورة والعزومات والعيال الصغيرة بالفوانيس في الشارع وريحه البيوت اللي مليانه طبيخ وحلويات رمضان
وكله كوم ولما نيجي نتكلم على البنات بصفه عامه والحب بصفه خاصه كوم تاني تطلع الاصوات ويطلع الشيوخ من جوه الشباب اللي اللي نازل من بيته جري عشان يشرب سجاير ويعقد على القهوه يقولك لا ياعم كله الا الكلام في ده ده حرام كأن البنات اتخلقوا عشان قله الادب بس وان اي كلام عن البنات حرام وان الحب خلاص يوقف في رمضان وان الناس اللي بتحب (بجد) تبطل حب عشان مينفعش في رمضان
انا مش متدين قوي بس معتقدش ان ربنا قال اننا نبطل نحب في رمضان او اننا نكره في رمضان الحب حاجه جميله قوي بتخلينا نعيش بتخلينا نكون كويسيين بيعلمنا الصدق بيعلمنا الوفاء بيعلمنا اننا نكون فعلا كويسين بيعلمنا الصبر بيعلمنا صفاء الروح
للعلم انا بتكلم عن الحب اللي بجد البيعد عن اي شهوات ناس هتقول ان الحب لازم يكون فيه شهوة انا مش معترض على ده بس الحب بيخلينا نبعد عن الجسم الحب بيخلينا نتعامل مع الروح مش مع الجسد ده الحب وده حلاوة الحب الحب عمره مكان حرام ولا غلط الحب طول عمرة اجمل مافي الكون بس المهم انه يكون حب بجد حب يخلينا نحس بنفسنا نتكبر عن اي حاجه وعن اي زنب الحب اللي في رمضان فعلا مش غلط-من وجهه نظري- لان اللي هيقول انه مش هيكلم حبيبته في رمضان عشان حرام ده مش بيحب ولا يعرف يعني ايه حب اصلا على العموم بعد كلام كتير اقولكم
رمضان كريم وواكيد برضه حب كريم
فجر فاروق
0 التعليقات: