رساله لسيادة الرئيس

رساله لسيادة الرئيس

كتب قومي عربي
الأحد، أبريل ١٩، ٢٠٠٩

بسم الله الرحمن الرحيم

سيادة رئيس جمهورية مصر العربية تحية طيبه وبعد

انا شاب مصري مقيم في احدى دول الخليج العربي وارجو ان تسمح لي بكتابة خطابي باللغه العامية لكي استطيع ان اعبر عن كل ما في داخلي

ياريس انا شاب بيحب بلده بجنون وبيحب امته جدا بس بسبب ظروف المعيشه السيئه اللي في مصر اخدت قرار السفر والهجره والغربه عن كل الناس اللي بحبهم وكل الناس اللي ليا معاهم ذكريات حلوة ووحشه

سيدي الرئيس عايز اشرح لحضرتك اسباب سفري انا للاسف من يوم ما اتولدت- للمعلومه انا من مواليد 1983- وانا معرفش ريس لا انت ومكدبش عليك ايام مكنت عايش وانا صغير في دول الخليج مع اهلي كنت بحبك وكنت بستنى احتفالات اكتوبر ووعيد ميلادك عشان اسمع الاغاني اللي بيغنوهالك زي اخترنالك وكل الاغاني اللي انته عارفها وكل الشعب حافظها دي وبالفعل فضلت احبك جدا لحد ما رجعت مصر ودخلت الجامعه وكنت لسه بحبك بس للاسف ياريس خلاص مقتش بحبك عارف ليه عشان انا مكنتش عايز اتغرب واسيب مصر وبسبب قله الفلوس في بلدي اتغربت انا والاف المصريين ويارتها غربه كويسه لا فيا اهانات عارف بسببك انت ياريسودي تقريبا خر القصيده وانا حبيت ابدأ باخر حاجه ختني مبقتش بحبك عشان تعرف الحاله اللي انا فيها نرجع لاول القصيده اول القصيده زي ما بيقولوا كفر والكفر ياريس اللي حسيته كان اكبر من اي احتمال الكفر مش بالله والعياذ بالله لا الكفر بلبلد ياريس عارف ليه عشان شفت ناس غلابه مش لاقيه تاكل شفت ناس في المقابر معتقدين انهم عايششن بس هم مش عايشين شفت ناس بتموت على طوابير العيش عشان رغيف عيش والله ياريس البط مش بيرضى ياكله شفت بنات بتضرب من عساكرك شفت شفت شباب زي الورد بيدخل سجونك عشان بيحبوا مصر حتى لو كانوا بيحبوه باسلوب انت شايفه غلط بس والله ياريس بيحبوها

من معاناتي الشخصيه ياريس اتخرجت من الجامعه وكنت اتمنى اشتغل شغلانه محترمه تكفيني على الاقل عشان ابطل اطلب من والدتي فلوس بس للاسف ملقتش ومحبتش اتاجر في المخدرات رغم انها مربحه جدا كنت ببقبض ملاليم كانوا بيرحوا في المواصلات وحاولت اني الاقي شغل يكفيني عشان اقدر اتجوز وابني بيت ينفع مصر وابعد عن الحرام اللي هو بقى كتير قوي ياريس في مصر بس ملقتش ورغم كده اشتغلت صحيح كنت باخد كلام فاضي بس كنت بقبض وبصرف على نفسي لمده اقل من 15 يوم وبعدين بح وافضل اكمل باقي الشهر بظروفها لحد ما سافرت انت عارف ياريس اني اكلت عيش متعفن اي والله عيش متعفن صحيح هتقولي ان العيب فينا وان الشغل كتير بس اللي يدور احب اقولك اني دورت ياريس وان العيب مش فينا

بعد 28 سنه في حكم مصر ام الدنيا الحال وصل بينا لايه اقول لحضرتك شباب عاطل بالهبل بنات معنسين برضه بالهبل شباب متغربين بالهبل وفوق كل ده وده لسه في ناس جعانه وناس مش لاقيه تتعلم وناس مش لاقيه تلبس واللي يغيظ ياريس ان في ناس ربنا فاتحه عليهم -مش بحسد والله انا بقر بس- من وسع والناس اللي حواليك كلهم من اللي انا بقر ليهم الناس قاعدين يقولوا توريث وكلام من كده -طبعا انا مقتنع بيه دا- وسياتك بتقول لا ولو قولت معاك انه لا طيب هو انا ليه مكنش امين لجنه السياسات منفعش عشان والدي - الله يرحمه - كان مدرس طيب ليه قولي ياريس باي حق وباي اسس بتعينو امناءللحكومه وباي اسس بدخلوا الناس السجن وباي اسس بتظلموا الشعب الشعب ياريس اللي نت نسيته مش انت وبس لا وكل حكومتك على مدار ال28 سنه تخيل ياريس بقالك 28 سنه رئيس دوله مزهقتش انا اشتغلت صحفي سنه ونص وزهقت انت بقالك 28 سنه بتشتغل ريس كان الله في عونك

ياريس انا مش بكرهك بس برضه مش بحبك بس انا بكره حكمك وبكره الظلم اللي انا حسيته لاني واحد بيحب مصر ومستحقش اني اتغرب عشان اعيش حياة محترمه ولا كتير عليا اني اعيش حياة محترمه في مصر بدون متغرب واتبهدل ومتقوليش والنبي محدش ضربك على ايديك عشن تسافر لا اضربت على ايدي وعلى رجلي وعلى -مقدرش اقول عشان الرقابه- عشان اسافر بس مسافر وانا تعبان وحاسس بالظلم مش من مصر ياريس مصر طيبه وجميله مش بتضرب حد اضربت من ال28 سنه حكم اضربت انا واجيال كامله من الشباب اللي حاسين ومفكرين ان مصر هي السبب وانت عارف وانا عارف ان مصر مش السبب

في الاخر احب اقول لحضرتك

كل سنه وانت طيب بس من غير ما نظلم مصر

تحياتي

شاب مصري