بين حزب الله وايمن وجميله و6 ابريل يا قلبي لاتحزن

بين حزب الله وايمن وجميله و6 ابريل يا قلبي لاتحزن

كتب قومي عربي
السبت، أبريل ١١، ٢٠٠٩

اسبوع بجد مرهق زهنيا ويوحي بالفشل الذريع اللي هب على مصر اه في فشل وبرضه ذريع مهبوب على مصر بقاله فترة طويله حركة 39 سنه بس كان متفرقبس الاسبوع اللي فات ده بس الوضع بقى مزرأب اكتر من الاول بكتير خصوصا ان في فشل قوي جدا حسيته فشل سياسي وفشل اجتماعي وفشل شبابي

ابدأ بحزب الله

طبعا قريت في الصحف زي كل الناس وسمعت في البرامج عن الخليه الارهابية المهلبيه الطعميه اللي قدرت قوات امن الدوله المبغله بتاعتنا انها تقبض عليها وتفككها وتقطعها وتحطها في السجون قبل الهنا بسنه زي ما قال حسن نصرالله في خطابه الي عايز اعلق عليه برضه اولا لا اختلاف على احترامنا لشخص حسن نصرلله (الاحترام والاعجاب فقط) وده نابع من معاداته لاعداءنا الحقيقين وهم الكيان لصهويني وامريكا وسياساتها وعدو تالت انا من وجه نظري المتواضعه خاف يواجهه وهو النظام المصري وعلى راسه حسني مبارك وزي ما بيقولوا متشطرش على .... واتشطر على ..... مجبش سيرت مبارك وقطع في النائب العام اللي وهو بياخد تعليماته من ال...ما علينا وكد امبارح حسن نصرالله انه ملوش دخل في الموضوع وانا حسيته صادق بس برضه اول مرة احسه قلقان وخايف وكأن النظام عندنا بيخوف وفعلا محستش بقوة حسن نصرلله المعتاده اللي بنشوفها وده انا حسيته فشل اكيد لهم حسابتهم الخاصه بالمعادله بس معجبنيش كلامه خصوصا انه بدأ ينفي اي علاقه ليه باي حاجه في الوطن العربي ومن حقه ودي كانت غلطتنا اننا فكرناه هيعمل زي عبدالناصر عندهم الهم العام اكبر واهم من الهم الخاص على العموم شكرا انه اتكلم رغم انه عملي شخصيا احباط على العموم هو حر يقول زي ما يقولوانا غلطان اني اعتقدت انه ممكن يكون او يقرب للزعيم الخالد على العموم ياريت بعد كده ميتكلمش عن الوطن العربي والعروبه ويخليه في بلده لبنان يعمل فيها الي هو عايزة بعيد عن اي مزايدات على مصر لانه قالها بعضمه لسانه امبارح اننا اصل الثورات واننا اصل المقاومه ودي حقيقه محدش يقدر ينفيها لا هو ولا غيرة مصر هي مصر وهتفضل مصر نبض العروبه بصرف النظر عن نظامنا الخائن لشعبه

ثانيا جميله وايمن

عرفت جميله اسماعيل في بداية االازمه بتاعت ايمن نور ودخوله السجن وكنت مقرب لها في فتره كنت فعلا شايفها من اقوى الشخصيات السياسيه بحكم عملي السابق وحلمي الدائم ايام مكنت صحفي وعرفت ايمن نور ايام حملته الانتخابيه وفتره السجن مع بعض ملاحظاتي الشخصيه على فكرة واسلوبه السياسي واللي مليش دعوه بيها غير اني بنظر للامر من نظرتي الشخصيه المحدوده وفجأه في وسط نظال الرائعه جميله اسماعيل وبعد ما عملت المستحيل عشان يطلع جوزها وبصر على جوزها مش زعيمها السياسي طلع من السجن فرحت جدا مش عشان واحد مظلوم طلع من اسجن لا عشان حسيت ان جميله اخيرا هترتاح من اللي فضلت تعمله تلت سنين من غير ملل ولا تعب ولا مرة اشتكت طلع ايمن نور من السجن عشان نسمع موضوع طلاقهم والحرب البارده للي بدأت بينهم في وسائل الاعلام وبدأت المزايدات اللي استفذتني والناس بتكتب وجروبات على الفيس بووك لا لانفصال ايمن وجميله وابراهيم عيسى يكتب عنهم واكيد ناس تانيه زاطت في الزيطه وكتبت وناقص يعملوا وقفه احتجاجيه لا لانفاصلهم خصوصا ان شباب الغد بيحب يعمل وقفات احتجاجيه كتيرة (للعلم اغلبهم او اكتريتهم اللي موجودين واللي راحوا حزب الجبهه اصدقائي ) مش عارف مالهم ومال حيات جميله وايمن الشخصيه وبدات بجميله مش بايمن الوقتي عشان ااكد ان جميله الاقوى والانقى والافضل بالنسبه ليا طبعا الناس دي مالها كلها اطلقوا ولا مطلقوش خلاص الشعب المصري خلص كل همومه وكل حاجه والدنيا بقت زي الفل ومنتظر اخبار جميله ونور ايه يا جماعه ايه الفشل الذريع ده ايه الفشل الاجتماعي الرهيب اللي وصلناله ده بجد حاسس بقسى شديد جدا خلاص وصلنا للمرحله دي اننا نزعل قوي عشان اتنين اطلقوا غريبه طب منا عنديواحد قريب طلق مراته غلطان اني معملتش جروب ليهم اه والله غلطان يا جماعه خليكم في حالكم وركزوا في مصر مصر اللي هي اكبر من طلاق اتنين وبقول من كل قلبي لو كنت اعرف ان السيده الجميله جميله اسماعيل كانت هتتعذب وتتعب تعب اكتر من التعب اللي تعبته في ال3 سنين اللي فاتوا كنت دعيت وقولت ياريتك مطلعت من السجن يا ايمن (كفايه عليهم كده)

يوم 6 ابريل

طبعا انا محضرتش 6 ابريل اللي فات لظروف سفري وبرضه محضرتش 6 ابريل ده لنفس الظرف بس مع متابعتي للاحداث حسيت ان 6 ابريل اللي فات كان افضل من ابريل ده واعتقد كل الناسشايفه ده مش انا لوحدي اه احبطت احباط شديد خصوصا اني تخيلت اننا هنعمل حاجه ويسمحولي شباب مصر الجميل شباب 6 ابريل اني اقول اننا عشان انا حاسس اني واحد منهم واقولهم يا شباب مصر احنا لسه موجودين وهنفضل موجودين وهيجي يوم وننجح ونقدر نعمل اللي معملوش قيادتنا والناس اللي بنئمن بيهم يا شباب مصر فشلنا اه مرة بس نجحنا مرة قبل كده واكيد هننجح تاني وحتى لو فشلنا لازم نؤمن اننا هيجي يوم علينا وهننجح لان من احنا اللي فشلنا اللي فشلنا الفقر والجوع وقله الحييله وتعب الناس بس مسيرهم هيثورا وساعتها ولا 10 مليون عسكري امن مركزي هيقدر يقفلوا مكان

هنحاول مرة واتنين وتلاته لحد ما تنجحوا ربنا معاكم يارب